’Wag kang matakot sa mga kwentong nilalaman ng librong ito.
Bangungot lamang ang gumigising kay Gino gabi-gabi. Ito ay ang pagpapatuloy ng paghahasik ng lagim ng napakalakas at napakasamang espiritung si Gunaw sa mundo ng mga tao.

Engkanto lamang ang sumusunod kay Clarissa. Nagkagusto sa kanya ang Engkanto, at balak nitong dakpin at dalhin siya sa mundo nito upang habambuhay makasama.

Multo lamang ang mga sumusunod at nagpaparamdam kay Jun-Jun, gising man siya o tulog. Ito ang kanyang kinaiinis na malagim na lihim.

Sa bawat kwento, maraming nakakatakot na maaaring mangyari, pero may mabubuting Elemento sina Gino, Clarissa, at Jun-Jun na magsisilbing kalasag at kasama nila sa panganib.

’Wag ka nang matakot. Buksan na ang unang pahina. Nariyan lamang ang mga Elemento.